Կորպորատիվ
կառավարման
ծառայություններ

Իրավաբանական անձանց վերակազմակերպում

 

Իրավաբանական անձի վերակազմակերպումը իրավաբանական անձի գործունեության դադարումը կամ իրավական կարգավիճակի այլ փոփոխությունն է, որի հետևանքով վերջինիս իրավունքներն ու պարտականությունները իրավահաջորդության կարգով փոխանցվում են մեկ այլ իրավաբանական անձի:

ՀՀ օրենսդրությամբ վերակազմակերպման ձևերն են.

• միաձուլում
• միացում
• բաժանում
• առանձնացում
• վերակազմավորում

Իրավաբանական անձանց միաձուլում է համարվում նոր իրավաբանական անձի uտեղծումը` նրան երկու կամ ավելի իրավաբանական անձանց իրավունքների և պարտականությունների փոխանցմամբ և այդ իրավաբանական անձանց դադարմամբ:

Իրավաբանական անձանց միացում է համարվում մեկ կամ մի քանի իրավաբանական անձանց դադարումը` դրանց իրավունքների և պարտականությունների փոխանցմամբ այլ իրավաբանական անձի:

Իրավաբանական անձի բաժանում է համարվում իրավաբանական անձի դադարումը` նրա բոլոր իրավունքների և պարտականությունների` նոր uտեղծվող իրավաբանական անձանց փոխանցմամբ:

Իրավաբանական անձի առանձնացում է համարվում նոր իրավաբանական անձի (իրավաբանական անձանց) uտեղծումը` նրան (նրանց) վերակազմակերպվող իրավաբանական անձի իրավունքների և պարտականությունների մի մաuի փոխանցմամբ` առանց վերակազմակերպվող իրավաբանական անձի դադարման:

Իրավաբանական անձի վերակազմավորում է համարվում նրա կազմակերպական-իրավական ձևի փոփոխությունը:

Իրավաբանական անձանց վերակազմակերպման համար Ընկերությունն առաջարկում է իր օգնությունը` վերակազմակերպման հետ կապված ցանկացած հարցով:

Իրավաբանական անձի կանոնադրական կապիտալի փոփոխություն

 

Ընդհանուր առմամբ, թե տեսությամբ, թե օրենսդրությամբ նշվում է, որ կանոնադրական կապիտալը սահմանում է իրավաբանական անձի պարտատերերի շահերը երաշխավորող ընկերության գույքի նվազագույն չափը:

Կանոնադրական կապիտալը կարող է փոխվել ինչպես ավելացման, այնպես էլ նվազեցման ճանապարհով: Նշված դեպքերից յուրաքանչյուրն ունի իր տարատեսակները և պատճառները, որի համակողմանի վերլուծությունն ու լավագույնս իրականացումը առաջարկում է Բիզնես Քարտուղարը: Ծառայությունը ներառում է ողջ գործընթացը` անկախ իրավաբանական անձի կազմակերպական-իրավական ձևից:

Բաժնետոմսերի համախմբում, բաժնետոմսերի պարտադիր գնման, վաճառքի, հետգնման օժանդակում

 

Բաժնետոմսերի համախմբում, բաժնետոմսերի պարտադիր գնման, վաճառքի, հետգնման օժանդակում:

Բաժնետիրական ընկերությունների կորպորատիվ շահը գերակա է առանձին վերցրած բաժնետիրոջ շահից։ Ընկերությունը ձայների որակյալ մեծամասնությամբ կարող է որոշում ընդունել իր կողմից տեղաբաշխված բաժնետոմսերի համախմբման մասին։ Փոքր բաժնետերերին դուրսմղման տարբերակ է նաև բաժնետոմսերի պարտադիր գնումը/վաճառքը։ Այս գործընթացները զգայուն են փոքր բաժնետերերի համար և դրանց պատշաճ, օրենքի տառին և ոգուն համապատասխան իրականացումը կասեինք պարտադիր է հետագա խնդիրներից խուսափելու համար։ Երաշխավորում ենք ինչպես արդյունավետ լուծման գալը, այնպես էլ գործընթացի պատշաճ իրականացումը։

Բաժնետերերի իրավունքների պաշտպանում

 

Եթե Դուք ընկերության ոչ թե խոշոր, այլ փոքր բաժնետեր եք, ապա Դուք նույնպես ունեք բազմաթիվ իրավունքներ։ Այդ իրավուքները շատ հաճախ չեն իրացվում, որից բնավ Դուք չեք շահում։ Պարտադիր չէ, որ Ձեր իրավունքներն ընկերությունը կամ խոշոր բաժնետերը խախտած լինի, որ Ձեզ մոտ առաջանան իրավունքներ։ Կապվեք մեզ հետ և մենք կաջակցենք այս հարցերով։

Իրավաբանական անձի լուծարում

 

Իրավաբանական անձի լուծարումը նրա գործունեության դադարումն է` առանց իրավունքներն ու պարտականություններն իրավահաջորդության կարգով այլ անձանց անցնելու:

Իրավաբանական անձի լուծարման ժամանակ նշանակվում է լուծարման հանձնաժողով, որին անցնում են իրավաբանական անձի գործերի կառավարման լիազորությունները:

Իրավաբանական անձի լուծարման կարգը սահմանված է ՀՀ քաղաքացիական օրենսգրքի 69-րդ հոդվածով: Ամեն դեպքում, լուծարումը համարվում է շատ ավելի բարդ գործընթաց, քան իրավաբանական անձի ստեղծումն է, այդ պատճառով նշված դեպքում անպայմանորեն խորհուրդ ենք տալիս դիմել մասնագետների:

Ընդհանուր ժողովների հրավիրում, անցկացում

 

Ժողովների պատշաճ հրավիրումն ու անցկացումը բարդ աշխատանք է: Որոշ դեպքերում, երբ իրավաբանական անձի սեփականատերերի քանակը համեմատաբար փոքր թիվ է կազմում կամ երբ սեփականատերերի միջև տարաձայնություններ չկան, ժողովներն իրենցից ներկայացնում են ձևական գործընթաց, որոնք կամ ընդհանրապես տեղի չեն ունենում կամ տեղի են ունենում «թղթի վրա»: «Թղթի վրա» տեղի ունեցած ժողովների արձանագրություն կազմելը, այնպես որ արձանագրվի և՛ այն ինչ անհրաժեշտ է և՛ այն ինչ օրենսդրությամբ է պահանջվում, նույնպես հատուկ գիտելիքների իմացություն է պահանջում:

Առավել բարդ է այն դեպքը, երբ անհրաժեշտ է ժողովը և՛ պատշաճ հրավիրել և՛ անցկացնել:

Նշված տարբերակներից յուրաքանչյուրի դեպքում մենք առաջարկում ենք մեր օգնությունը և երաշխավորում կատարվող աշխատանքի որակը:

Իրավաբանական անձի առանձնացված ստորաբաժանումների ստեղծում, հաշվառում, դադարում

 

Համաձայն ՀՀ քաղաքացիական օրենսգրքի իրավաբանական անձի առանձնացված ստորաբաժանումներն են ներկայացուցչությունները և մասնաճյուղերը:

Ներկայացուցչություն է համարվում իրավաբանական անձի գտնվելու վայրից դուրս տեղակայված նրա առանձանցված ստորաբաժանումը, որը ներկայացնում է իրավաբանական անձի շահերը և իրականացնում դրանց պաշտպանությունը:

Մասնաճյուղ է համարվում իրավաբանական անձի գտնվելու վայրից դուրս տեղակայված նրա առանձանցված ստորաբաժանումը, որն իրականացնում է նրա բոլոր գործառույթները կամ դրանց մի մասը` ներառյալ ներկայացուցչության գործառույթները:

Հիմնարկ է համարվում կառավարչական, սոցիալ-մշակութային, կրթական կամ ոչ առևտրային բնույթի այլ գործունեություն իրականացնելու համար իրավաբանական անձի ստեղծած կազմակերպությունը:

Ներկայացուցչությունները, մասնաճյուղերն ու հիմնարկները իրավաբանական անձինք չեն ու գործում են իրավաբանական անձի հաստատած կանոնադրությունների հիման վրա:

Իրավաբանական անձի ներկայացուցչությունների, մասնաճյուղերի ու հիմնարկների ստեղծումը, հաշվառումը և դադարումը գործընթաց է և դրա իրականացման համար անհրաժեշտ է դիմել մասնագետի: